العنقاء
هل يا ترى بتذكرني
هل يا ترى بتذكرني ؟؟؟
إذا مرت سنه ...سنتين ...
وانولدت قلوب ...
وماتت قلوب ..
واختلط بعضها
بالثرى والطين ...
اذا مرت بعدها سنين
وشفت الناس غير الناس
وصار
الغش ف الدنيا بلا مقياس ...
واحترق ف الدجى قرطاس ....
كان يحمل ...حروف اسمي ..
وتبدلت أرقام ....
وبدلت انته نوع العطر ...
وجفت الأقلام ...
هل يا ترى بتذكرني ؟؟
لو مرت سنه ...سنتين ...
وزاد وزنك ...شوي ...
عن السبعين ...
وزاد اللون الأبيض ف شعر راسك
وقالوا لك .....
بياض الشعر م التفكير ..
واصبر ....
يا ابو محمد...بعدها الدنيا بخير
وضحكت كثير ...
وخبرتهم ...ان ..
ما شرط بياض الشعر ..
يعني انك بالعمر صرت ... كبير..
بعد هالعمر ...يا ترى
بتذكرني ؟
لو مرت سنه.... سنتين ...
و مريت الشارع ...اللي
مرينا فيه.. قبل سنين ...
وشفت الدرب متغير ..
ومكانه ... شبه دوار ...
والأشجار ؟؟
وينها ....من اللي..
بهدل الأشجار ...وتلطخ
اخضرارها بالطين ...؟؟؟
وبدال الورد ...نبت .. ...
جنبها ....يقطين ...
وصار الشارع ...
شبه ..مهجور ...
منكسر ...مسكين
هل يا ترى بتذكرني ؟؟
لو مرت سنه ...سنتين ...
ومريت بالصدفه على مطرح ...
وزرت من بعدي "سوق الظلام"
وشفت المرسى متغير ..
ومابقى على البحر ...
الا بقايا ثرثره .... موجه..
ذوبها .. ..كثر الكلام
وهاجرت كل النوارس ...
و الاشرعه ...كل الاشرعه ..
غلفها الضباب
و تجعد وجه مطرح
و ما صار يجيها مثل أول
ف الغروب ..أحباب
ولا بقى فيها ..إلا مراكب الصيد
القديمة ....
ونورس وحيد وقف على قمة شراع ..
ولا بقى ...إلا
ظلال ...من ماضي ..حزين
مختوم بقلاع ....
ساعتها
هل يا ترى بتذكرني ؟
لو مرت سنه ....سنتين ...
و مريت ...بالصدفة ...ورا "كارفور" ...
و مريت على البيت اللي ....
كان عاجبنا زمان .....
ووقفت جنب السور ...
وشفت عليه لافته ..."للبيع"
والبيت كنه شبه مهجور ...
وذكرت ..وش كثر تمنينا ...
نفس الوانه ...
وش كثر غبطنا ..اهله وسكانه ..
كم تمنينا ...
نفس الباب والشرفه ....
كم تخيلنا ... وتسائلنا ...فيه كم غرفه ...؟
وكم ..فكرنا ...وفكرنا ...
هل يا ترى لو مريت
جنبه ...فعلا ... بتذكرني؟؟
اذا مرت سنه ....سنتين ...
وكنت يوم رايح "المسجد"
وسمعت ...
حد يناديك
"صباحك خير ..يا أبو محمد"
وضحكت ...
ضحكتك اللى بالحيل تعجبني ..
واللى تخلى الدم
بي يجمد...
ويتمرد ...
واتوسد ..
ضحكتك ..ايام
واذكرها ...كل ليله قبل لا
الملم احلامي
واشتاقك..وانام
عندها ....
هل يا ترى بتذكرني ؟؟؟
لو مرت سنه ...سنتين ....
ابيك ...تذكرني إذا رجعت
البيت متأخر
ورجعت بك الذكرى ..
زمان بعيد ..
لما كنت انتظرك على "الصوفا"
وانام هناك ...الين تعود.. .
وبلمسه ...تصحينى ..
وتزعل مني ...
وترجع تراضيني ...
صارت الصوفا تحتظن عطري
وبقايا من امس ذكراي
وصرت تجي كل ليله متأخر
ولا تلاقي
إلا الهم ينتظرك ...بدل شكواي ..
ف هاللحظه .....
هل يا ترى بتذكرني ؟؟
العنقاء
نشرت في جريدة فتون
يارب مايطلع على عيوني صباح
يا رب ما يطلع
على عيوني صباح!
الليلة
لو حصل إني ومت
بموت مزحومة بجراح-
يا رب ما يطلع على عيوني
صباح..!
ودي ف هالليله جناح
ياخذني بعيد ..
و أسافر للغيوم
واجمع ف منديلي
حفنة نجوم
ازرع نجمتين ف قلب الجدار
واعلق نجمتين ف غرفتي
تضويني ف عز النهار
واخبي الباقيات
تحت وسادتي..
وبعضها ما بين الهدوم ..
بسامرها ..بغلا
وبعلمها وش معنى الهموم!
ودي ف هالليله لحاف
شرشف ف بياض الثلج
محشو بالدفء والنور
مرسوم على طرفه اليمين
ورده عانقت عصفور
ودي أتخبى فيه إلى حد النخاع
وانسي وش ممكن بكره
يصير
و لا أفكر ف لقانا
ولا أفكر ف الوداع!
ودي ف هالليله ....نورس وحيد ...
ياخذ ..همومي ويسافر بعيد
يرميها ..ف ..
عرض البحر ...وتاخذها الرياح
وتغرق ..هناك ..
ويجينا الصباح ..
وأنسى أنا ..أخيرا
وش معنى الجراح ..
العنقاء
نشرت في جريدة فتون الاسبوعية
ولكني أحببته
ولكني أحببته!
كان قاسيا كالوجع
مؤلما كزمهرير الخيانة
بشعاً كالوداع
قاتما كالفراق
ولكني أحببته!
وكان حناني كالغمام
وكان قلبي كالوطن
وكان صبري بعمق المحيطات
ولكنه لم يحبني !
كان جارحاً كالخيانة
موجعاً كالانتظار
قاسياً كالاحتضار
بارداً كالصقيع
ولكني أحببته!
وكان حبي كظلال الزيزفون
وكان قلبي كحدائق الوفاء
وكان حنيني
كحنين الياسمين ...لأنفاس المطر
ولكنه لم يحبني !
وكان بعيدا كنجم
غادراً كبحر
غامضاً ك-ليل
متقلباً كمحيط
ولكني أحببته!
وكنت قريبه "ك-حبل الوريد"
واضحة كالنهار
نقية كالماء
شفافة كالشلالات البعيدة
ولكنه لم يحبني !
وكان جحيماً كالسراب
صلباً كالعذاب
مكفهراً كآخر شهقات الموت
ولكني أحببته!
وكنت دافئة كالذكريات
شقيه كفراشات الحقول
هشة كأوراق الخريف
ولكنه لم يحبني !
كان خيالاً صاغته أوهامي
ولهذا أحببته
ولهذا لم يحبني !
العنقاء
نشرت في جريدة فتون
من يقول ما يحس الميتين؟
من يقول ما يحس الميتين ؟
و إذا قريت آية .. ..الكرسي على بقايا
الطين
اعرف ...
إني بزهر ياسمين
(1)
ادفنوني...عند بابه
عشان لو مر بكره ...
عند قبري...
يمتلي قبري بنفسج
وتختفي عني الكآبة ....
(2)
من يقول ما يحس الميتين ؟
أنا ....
لو أشوفك ...لو أحسك
لو أشمك ...
يصير قبري .. ...ياسمين
يصير قبري
ما
تراب ولا هو طين ؟
يصير شئ أشبه ...بالحنين ...
يصير شئ...
غير ....غير
كنه الفرح ..ف قبري
سجين ...
(3)
مر صوبي ....
وادعي ربك
يغفرها ذنوبي ...
مر صوبي...
أوقف عند قبري
حط أيدك....
ادعى ربك...
تذكر الناس ...بالخير قلبي
وينسوها .....عيوبي ...
و إذا قريت آية .. ..الكرسي على بقايا
الطين
اعرف ...
إني بزهر ياسمين
العنقاء
نشرت في جريدة فتون
قول أحبك
نزف منفرد
قول احبك !
قول انك تحبني
لنك لو قلتها
ب-يختلف طعم الصباح
ب-يتبدل لون المسا
ب-ينبت للغيمة جناح
لو قلت احبك
ب-تنتعش فيني مشاعر
ب-ترجع طيور
لها لون الفرح
تعودت عني تهاجر
لو قلت احبك
ب-تنتعش فيني بلاد
ب-يرتعش نبض اللي مات
ب-تتجمع الغيمات
من بعد التفرق والشتات
لو قلت احبك
بصير عصفوره
نست معنى الأنين
بصير أسطورة عاشقين
لو قلت احبك
ب-تنكوي كل الجروح
بيصير للغيمة عيون
بيصير للشاطئ
قواقع وألف لون
بيصير طعم الدمع سكر
بيصير الوله
اكبر واكبر
والسما بتضحك للنجوم
ولو قلتها
ب-يدور على الحزن الرحى
وب-ينطحن
وبيتطاير إلى ابعد مدن
وبيمطر على الصحرا سراب
وبيندفن
أخر النزف :
كنت اسمي حبك الكاذب
غرام
كنت احلف إن قلبك ما نبض
إلا بحضوري
وأحيان كنت أتمادى بغروري
وأقول غيري ماعشق
وما يملي عيونه إلا نوري
كان حبك ألف كذبه
لعبه..
وين أنا بهاللعبة دوري..؟
العنقاء
نشرت في جريدة فتون
عبث
عبث
قليل الخير ف الدنيا
ونادر ...لو انكسرت روحك تلاقي حد يسندها!
قليل الخير ف الدنيا وصار الوفا نادر
واللي يحب صار ف الدنيا مغامر ..
والنتيجه ف الاخر...انه شبه خسران
ولو الانسان طاح ف ازمه
ولو تحطم ف الدجى عزمه
وتلفت ف المسا حوله..
ما يلاقى الا احزان
تكسر كل اركانه
وتتسابق لجل تحطم....فيه ايمانه
وياما
تحطم ف الدجى ايمان!
قليل الخير ف الدنيا
المخلص ف دنيتنا شبه غلطان
والطيب يتجازى بدال الطيب بالنكران
والخاين فوق الراس
وبالاخر هو الكسبان
واذا تبا قلبك من ضلمهم يسلم
كون انسان
اقوى من قساوتهم
ولا تعطى شئ بالمجان
ولا تسمح ولو باسم الحب
مشاعرك تنهان ....
قليل من يملا دنيتك بدال
الاسود .. بأجمل الالوان
قليل يتجازى الاحسان بالاحسان
نادر من يذكر المعروف
ونادر من تحبه..يذكرك..بالخير
والقاسي تحبه الناس وبدال الكف
تمد له عشر كفوف
اشوف الدنيا تمشى بالمعكوس
القاسي غالى كثير
والطيّب
ينباع بأبخس الاثمان
العنقاء
نشرت في ملحق مرافئ التابع لجريدة الوطن العمانية
الاشتراك في:
الرسائل (Atom)
بين الأرواح
-
صباحك نكهة الماضي ! لوحات صباحية بريشة : العنقاء صباح الخير والرحمة صباحك دنيا من الأشواق مزدحمة صباح الشاهي و الزعتر صباحك نكهة المرم... -
ما كنك نسيت قبل لا تروح تنهيني! ماكنك نسيت قبل لا تروح تنهيني وتمحيني من الدنيا وتكتبني فعل ماضي؟؟ ما كنك نسيت تخبرني قبل لا تروح وش أسو... -
وش أجاوب قلب أمي ....! وش أجاوب قلب أمي ..لو سألني ليش متغير هالفتره لوني ؟ ليش ...صرت ...غارقة ف وحدتي ... وليش وسط سوالفهم ..بالجسد بس... -
ومر العمر وتجعد وجه الانتظار وصارت شرايينه تعب وصار نومه بالغصب وعكازه ذكريات وما بقى غير الصبر ! واحتضر نبض الصباح وصار الليل ليل أكثر... -
أحلام صغيرة كبيرة جدا احلم إني أنا وياك نجمتين صغار لنا نفس ألوان الشعاع ونفس التناهيد الصغيرة لنا نفس الهموم لنا نفس المساحة في السم... -
أسئلة بعد الفراق شهرين ونكمل سنه على ذكرى الفراق من سكن بعدي ضلوعك ؟ من مسح ..عنك دموعك؟ من كتب لك ..على حزن الغيوم? من ..جمع لك ..من الظ... -
رجعت ..الحين للأسف..يا صاحبي فات الأوان.. أبشرك قلبي كبر ... وصار متمرد على الأحزان المعذرة ... طويت ...صفحتك ... و ...حرقتها .. ما عا... -
ما ضاقت الدنيا بدونك! - دنياي- اللي كان محورها عيونك ... تطمن .. بعد فرقاك ... ما ضاقت بدونك ..! تطمن..... ما ضاقت الدنيا بدونك ولا... -
خذني إلى باريس ! *كتبت في الطريق إلى مسقط 21-7-2010 *خذني إلى باريس عشان أوقف..على قمة برج ايفل وبعمق الروح اصرخ...وعلى الواقع المغرور بتم... -
بين الوعي والا وعي حسيت ...سكينك هنا تنحفر في أضلعي وتداعيت من طولي أنا واصرخ يا معين غير ربي من معي ؟؟ وبين الوعي والا وعي ... ترجي...
.
